ជំងឺថង់ទឹកប្រមាត់ និងការព្យាបាលតាមបែបទំនើប៖ អ្វីដែលអ្នកគួរដឹងអំពីការវះកាត់ឆ្លុះ​​?

 កម្រមានអ្នកជំងឺមកជួបខ្ញុំ ហើយនិយាយចំៗថា “ខ្ញុំច្បាស់ណាស់ថាខ្ញុំឈឺថង់ទឹកប្រមាត់”។ 

ភាគច្រើន ពួកគាត់តែងតែរៀបរាប់ពីអាការៈម្យ៉ាងដែលកើតឡើងបន្តិចម្តងៗយូរទៅៗ ដូចជា៖ ញ៉ាំអាហារហើយមានអារម្មណ៍មិនស្រួលក្នុងពោះ, ចង់ក្អួតដោយគ្មានមូលហេតុ, ការឈឺចាប់ដែលចេះតែផ្លាស់ទីកន្លែង, ឬមានអារម្មណ៍តឹងណែននៅក្រោមឆ្អឹងជំនីរ ហើយបាត់ទៅវិញ។ ដោយសារតែរោគសញ្ញាទាំងនេះមិនសូវច្បាស់លាស់ មនុស្សជាច្រើនរស់នៅជាមួយបញ្ហាថង់ទឹកប្រមាត់នេះយូរឆ្នាំ ដោយមិនដឹងថាវាជារោគសញ្ញានៃជំងឺនេះឡើយ។ 

គោលបំណងរបស់ខ្ញុំនៅទីនេះ គឺចង់ពន្យល់អ្នកឲ្យបានច្បាស់ថា តើរោគសញ្ញាទាំងនេះមានន័យដូចម្តេច, របៀបដែលយើងធ្វើរោគវិនិច្ឆ័យ (រកមើលជំងឺ), និងថាតើការ វះកាត់ឆ្លុះ ដើម្បីយកថង់ទឹកប្រមាត់ចេញនោះ គេធ្វើដូចម្តេចខ្លះ រួមទាំងអត្ថប្រយោជន៍ និងហានិភ័យ ដើម្បីឲ្យអ្នកអាចសម្រេចចិត្តបានត្រឹមត្រូវ។ 

របៀបដែលបញ្ហាថង់ទឹកប្រមាត់ចាប់ផ្តើម 

ជំងឺថង់ទឹកប្រមាត់មិនកើតឡើងភ្លាមៗទេ។ នៅដំណាក់កាលដំបូង រោគសញ្ញាអាចមើលទៅដូចជាបញ្ហារំលាយអាហារធម្មតា៖ 

• ចង់ក្អួត ក្រោយពេលញ៉ាំអាហាររួច ជាពិសេសអាហារចៀន ឬមានខ្លាញ់ច្រើន។ 

• មានអារម្មណ៍ហើម ឬតឹង នៅក្នុងពោះផ្នែកខាងលើ។ 

• មិនស្រួលខ្លួន នៅក្រោមឆ្អឹងជំនីរខាងស្តាំ។ 

• មានអារម្មណ៍ថាការរំលាយអាហារ “យឺត“ ឬក្រ-រលាយ។ 

យូរៗទៅ រោគសញ្ញានឹងវិវត្តទៅជា៖ 

• ឈឺពោះផ្នែកខាងលើ ញឹកញាប់។ 

• ការឈឺចាប់រាលដាល ទៅដល់ខ្នង ឬស្មាស្តាំ។ 

• ក្អួត ក្រោយពេលញ៉ាំអាហារ។ 

• កាន់តែមិនអាចញ៉ាំអាហារមានខ្លាញ់បាន (ញ៉ាំហើយធ្វើទុក្ខភ្លាម)។ 

• ការឈឺចាប់ ដែលជួនកាលច្រឡំថាជាការឈឺក្រពះ (ចុកឆ្អើ) ឬឈឺទ្រូង។ 

អ្នកជំងឺជាច្រើនទើបតែមកជួបគ្រូពេទ្យនៅពេលដែលការឈឺចាប់កើតឡើងញឹកញាប់ ឈឺខ្លាំង ឬឈឺរហូតដល់ដេកមិនលក់នៅពេលយប់។ 

ពេលណាដែលរោគសញ្ញាគួរឲ្យព្រួយបារម្ភ

រោគសញ្ញាមួយចំនួនបង្ហាញថា ថង់ទឹកប្រមាត់មិនត្រឹមតែរលាកប៉ុណ្ណោះទេ ប៉ុន្តែអាចកំពុងតែមានការស្ទះ ឬរលាកធ្ងន់ធ្ងរ៖ 

• ឈឺចុកចាប់ខ្លាំង អូសបន្លាយរាប់ម៉ោង។ 

• ក្តៅខ្លួន និងញាក់។ 

• ភ្នែក ឬស្បែកឡើងពណ៌លឿង (ខាន់លឿង)។ 

• ចង់ក្អួត ឬក្អួតខ្លាំង។ 

• មានអារម្មណ៍ថាឈឺធ្ងន់ ឬដូចជាត្រូវថ្នាំពុល។ 

សញ្ញាទាំងនេះអាចបញ្ជាក់ថាមាន ការរលាកថង់ទឹកប្រមាត់ស្រួចស្រាវ, គ្រួសស្ទះដំណើរទឹកប្រមាត់, ឬការរលាកផ្លូវទឹកប្រមាត់ ដែលត្រូវការការសង្គ្រោះបន្ទាន់។ 

របៀបដែលយើងពិនិត្យរកជំងឺនេះនៅមន្ទីរពេទ្យ អុីនធ័រឃែរ

ចំណុចល្អមួយសម្រាប់អ្នកជំងឺ គឺការពិនិត្យរកជំងឺនេះមានភាពងាយស្រួល និងមិនឈឺចាប់ឡើយ។ 

ការថតអេកូ – ជាការពិនិត្យដ៏សំខាន់ 

ការថតអេកូគឺជាជំហានដំបូង និងល្អបំផុត ព្រោះ៖ 

• មិនត្រូវការចាក់ថ្នាំ ឬដាក់សេរ៉ូម។ 

• មិនឈឺចាប់ និងចំណាយពេលលឿន។ 

• អាចមើលឃើញ គ្រួសក្នុងថង់ទឹកប្រមាត់ បានច្បាស់។ 

• អាចមើលឃើញការរលាក ឬទឹកដក់ជុំវិញថង់ទឹកប្រមាត់។ 

• ជួយមើលថាតើបំពង់ទឹកប្រមាត់មានការរីកធំដែរឬទេ (ដែលបញ្ជាក់ថាមានការស្ទះ)។ 

ក្នុងករណីភាគច្រើន គ្រាន់តែថតអេកូ បូករួមនឹងការពិនិត្យរាងកាយ និងតេស្តឈាមបន្តិចបន្តួច គឺគ្រប់គ្រាន់ដើម្បីបញ្ជាក់ថា៖ 

• មានគ្រួសក្នុងថង់ទឹកប្រមាត់។ 

• មានការរលាកថង់ទឹកប្រមាត់។ 

• មានបញ្ហានៅបំពង់ទឹកប្រមាត់។ 

• និងថាតើគួរធ្វើការវះកាត់ដែរឬទេ។ 

អ្នកជំងឺតែងតែមានអារម្មណ៍ធូរចិត្ត ពេលដែលពួកគាត់បានយល់ច្បាស់ថាមានអ្វីកើតឡើង និងដឹងពីជម្រើសនៃការព្យាបាល។ 

តើការវះកាត់ឆ្លុះគេធ្វើដូចម្តេច? 

នៅពេលដែលរោគសញ្ញាកើតឡើងញឹកញាប់ ឬធ្ងន់ធ្ងរ ឬការថតអេកូឃើញថាមានគ្រួសដែលបង្កបញ្ហា ការវះកាត់យកថង់ទឹកប្រមាត់ចេញគឺជាការព្យាបាលដែលត្រឹមត្រូវបំផុត។ 

ការវះកាត់ឆ្លុះ ត្រូវបានអនុវត្តដោយសុវត្ថិភាពទូទាំងពិភពលោកអស់ជាច្រើនទសវត្សរ៍មកហើយ និងត្រូវបានចាត់ទុកជាស្តង់ដារមាស នៃការព្យាបាល។ 

របៀបនៃការវះកាត់៖ 

1. គ្រូពេទ្យនឹងបង្កើត មុខកាំបិតតូចៗចំនួន ៤ កន្លែង នៅលើពោះ។ 
2. កាមេរ៉ា មួយនឹងត្រូវដាក់ចូល ដើម្បីមើលឃើញថង់ទឹកប្រមាត់ និងបំពង់ទឹកប្រមាត់បានច្បាស់ល្អនៅលើអេក្រង់។ 
3. ថង់ទឹកប្រមាត់ត្រូវបានកាត់ផ្តាច់ចេញពីសាច់ជុំវិញដោយប្រុងប្រយ័ត្ន។ 
4. សរសៃឈាម និងបំពង់ដែលភ្ជាប់ថង់ទឹកប្រមាត់ ត្រូវបានគាប និងកាត់។ 
5. ថង់ទឹកប្រមាត់ត្រូវបានយកចេញតាមរន្ធតូចមួយដែលមានទំហំប្រហែល ១២-១៥ មីលីម៉ែត្រប៉ុណ្ណោះ។ 

ដោយសារតែការវះកាត់នេះមិនតម្រូវឲ្យវះពោះធំ សាច់ដុំពោះរបស់អ្នកនៅរក្សាភាពរឹងមាំដដែល ដែលជួយកាត់បន្ថយការឈឺចាប់ក្រោយវះកាត់បានយ៉ាងច្រើន។ 

ហេតុអ្វីបានជាការយកថង់ទឹកប្រមាត់ចេញមិនមានគ្រោះថ្នាក់? 

ថង់ទឹកប្រមាត់មានតួនាទីត្រឹមតែ ស្តុកទុក ទឹកប្រមាត់ប៉ុណ្ណោះ វាមិនមែនជាអ្នក ផលិត ទឹកប្រមាត់ទេ។ ក្រោយពេលយកថង់នេះចេញ ទឹកប្រមាត់នឹងហូរដោយផ្ទាល់ពីថ្លើមទៅកាន់ពោះវៀនជាប្រចាំ។ អ្នកជំងឺភាគច្រើនអាចសម្របខ្លួនបានយ៉ាងលឿន និងអាចញ៉ាំអាហារបានជាធម្មតាវិញ។ 

អត្ថប្រយោជន៍នៃការវះកាត់ឆ្លុះ 

បើធៀបនឹងការវះកាត់បើកពោះធំ ការវះកាត់ឆ្លុះមានអត្ថប្រយោជន៍សំខាន់ៗជាច្រើន៖ 

• ឆាប់ត្រឡប់ទៅរស់នៅជាធម្មតាវិញ អ្នកជំងឺភាគច្រើនអាចធ្វើសកម្មភាពស្រាលៗបានវិញ ក្នុងរយៈពេលតែពីរបីថ្ងៃប៉ុណ្ណោះ។ 
• ឈឺតិចតួច មុខរបួសតូចៗ មានន័យថាការប៉ះទង្គិចតិច និងឆាប់ជាសះស្បើយ។ 
• ហានិភ័យនៃការបង្ករោគនៅមុខរបួសមានកម្រិតទាប ដោយសារមុខរបួសតូចខ្លាំង ឱកាសដែលមេរោគចូលគឺមានតិចបំផុត។ 
• មើលឃើញច្បាស់ និងសុវត្ថិភាពជាង កាមេរ៉ាពង្រីកជួយឲ្យគ្រូពេទ្យវះកាត់មើលឃើញសរសៃតូចៗបានច្បាស់ជាងការវះកាត់បើកពោះទៅទៀត ដែលវាសំខាន់ណាស់នៅពេលដែលថង់ទឹកប្រមាត់កំពុងរលាក។ 
• ស្នាមវះកាត់តូច ស្នាមរបួសតូចៗ ធ្វើឲ្យមើលទៅស្អាត និងមិនសូវឃើញស្នាម។ 

ហានិភ័យដែលអាចកើតមាន និងអ្វីដែលអ្នកជំងឺគួរដឹង 

ទោះបីជាការវះកាត់ឆ្លុះមានសុវត្ថិភាពខ្ពស់ក៏ដោយ វានៅតែជាការវះកាត់។ ហានិភ័យដែលអាចកើតមានរួមមាន៖ 

• ស្នាមជាំ ឬហើមតិចតួចជាបណ្តោះអាសន្ន។ 

• ឈឺចុងស្មា (បណ្តាលមកពីឧស្ម័នដែលប្រើអំឡុងពេលវះកាត់ ប៉ុន្តែវានឹងបាត់ទៅវិញឆាប់ៗ)។ 

• ការលេចធ្លាយទឹកប្រមាត់ (កម្រកើតមាន)។ 

• ការបង្ករោគ (ហានិភ័យទាប)។ 

• ការប៉ះពាល់ដល់សរីរាង្គក្បែរខាង ដូចជាបំពង់ទឹកប្រមាត់ (កម្រកើតមានណាស់)។ 

• តម្រូវការប្តូរទៅជាការវះកាត់បើកពោះធំ ក្នុងករណីដែលពិបាកខ្លាំង ឬរលាកខ្លាំងពេក។ 

ជារួម អត្រានៃផលវិបាកគឺមានកម្រិតទាបណាស់ ជាពិសេសចំពោះការវះកាត់ដែលបានគ្រោងទុក (មិនមែនការវះកាត់សង្គ្រោះបន្ទាន់)។ 

ហេតុអ្វីការធ្វើរោគវិនិច្ឆ័យ និងព្យាបាលទាន់ពេលគឺសំខាន់ 

ពេលវេលាគឺសំខាន់ណាស់។ ការទុកយូរពេកអាចនាំឲ្យមាន៖ 

• ការឈឺចាប់រើឡើងវិញញឹកញាប់។ 

• ការរលាកថង់ទឹកប្រមាត់ស្រួចស្រាវ។ 

• ការកើតខ្ទុះ។ 

• ការស្ទះបំពង់ទឹកប្រមាត់។ 

• ការរលាកបំពង់ទឹកប្រមាត់ធ្ងន់ធ្ងរ ដែលអាចគ្រោះថ្នាក់ដល់ជីវិត។ 

• ការរលាកលំពែង ដោយសារគ្រួសធ្លាក់ចូល។ 

• ត្រូវវះកាត់សង្គ្រោះបន្ទាន់ ដែលមានហានិភ័យខ្ពស់ជាងការវះកាត់ដែលបានគ្រោងទុក។ 

នៅពេលដែលជំងឺថង់ទឹកប្រមាត់ក្លាយជាធ្ងន់ធ្ងរ ការវះកាត់នឹងកាន់តែពិបាក ហើយការជាសះស្បើយក៏ប្រើពេលយូរជាងមុនដែរ។ 

ដំណើរការងាយស្រួល និងរហ័សនៅមន្ទីរពេទ្យ អុីនធ័រឃែរ

ដើម្បីជួយអ្នកជំងឺពីភាពមិនច្បាស់លាស់ មកជាភាពច្បាស់លាស់ មន្ទីរពេទ្យ Intercare បានបង្កើតដំណើរការពិនិត្យថង់ទឹកប្រមាត់ពិសេសមួយដែលផ្តល់ជូន៖ 

• ថតអេកូក្នុងថ្ងៃតែមួយ។ 

• ជួបពិគ្រោះយោបល់ក្នុងថ្ងៃតែមួយ។ 

• ការពិភាក្សាផ្ទាល់ជាមួយក្រុមគ្រូពេទ្យវះកាត់។ 

• ការកំណត់កាលវិភាគវះកាត់ឆ្លុះបានឆាប់រហ័ស តាមភាពចាំបាច់។ 

អ្នកជំងឺជាច្រើនប្រាប់ខ្ញុំថា ការដែលមានផែនការព្យាបាលច្បាស់លាស់ ជួយកាត់បន្ថយការភ័យខ្លាចរបស់ពួកគាត់បានយ៉ាងច្រើន។ 

រស់នៅដោយគ្មានការឈឺចាប់ពីថង់ទឹកប្រមាត់ម្តងទៀត 

អ្នកជំងឺជាច្រើនបានរៀបរាប់ថា ពួកគេមានអារម្មណ៍ធូរស្រាលខ្លាំងនៅពេលដែលថង់ទឹកប្រមាត់ត្រូវបានយកចេញ។ពួកគេអាចរីករាយនឹងការញ៉ាំអាហារឡើងវិញ ឈប់បារម្ភថានឹងឈឺពោះទៀតនៅពេលណា និងអាចរស់នៅប្រចាំថ្ងៃបានដូចដើម។ 

ការវះកាត់ឆ្លុះ គឺជាដំណោះស្រាយដ៏ទំនើប សុវត្ថិភាព និងមានប្រសិទ្ធភាពសម្រាប់ជំងឺថង់ទឹកប្រមាត់។ ជាមួយនឹងការពិនិត្យទាន់ពេលវេលា ការជាសះស្បើយនឹងមានភាពរលូន និងទទួលបានលទ្ធផលល្អក្នុងរយៈពេលវែង។ 

ប្រសិនបើអ្នកកំពុងជួបប្រទះអាការៈចង់ក្អួតក្រោយញ៉ាំអាហារ, មិនស្រួលក្នុងពោះផ្នែកខាងលើ, ឬឈឺពោះម្តងៗ (ទោះបីជាវាបាត់ទៅវិញក៏ដោយ) នេះអាចជាពេលវេលាដ៏ត្រឹមត្រូវដែលអ្នកគួរមកពិនិត្យឲ្យបានច្បាស់លាស់។